Tʋ "bo nmɔ 'diwɔn.
106
Ao 'bɛɛ‑ Tʋ "bo 'a 'nynɩ "i.Ao 'bɛɛ ɛ "i, dɛ ‑nʋɛ ɛ nmɔ 'diwɔn jeejee,
ɛɛ' nyʋ 'a ‑tɩ kmaa' se "ti ‑ta 'ble.
2 Nyɔ ‑bɛɛ'‑ dɩ klae" Tʋ "bo nʋa 'a 'tmʋaa‑?
‑Ɔ ‑bɛɛ'‑ ɛɛ' 'nynɩ 'wlʋʋa' i 'jrɛɛa' ‑ta ‑wee'‑ ‑ɛ?
3 Nyʋ ‑ʋʋa ‑jea Kea 'a kɛ' wɔn,
‑ʋʋa nʋa "isrɛ dɩ 'nɔ "o 'nɔ ‑wee'‑ 'di ɛ, ʋʋ nʋ 'mʋa‑.
4 Ɛ po 'ma ‑tɩ' ‑kwlʋ o Tʋ "bo,
ɛmɛ ‑ɛ 'di nmɔawɔn 'de ɛɛ' 'cɛ 'ɛ ‑tɩ' 'ʋn ɛ,
ɛ ji ɛ 'je 'ʋn 'pʋʋ‑!
5 'De 'ɩn 'je ɛɛ' nyʋ ɛ ‑tea 'o 'a ‑pɔia" "jriɛ 'jee‑,
‑wɛe 'ɛ 'cɛ 'ɛ 'mʋa‑ 'je 'ma 'mʋa‑ nɩ‑.
6 Ka ‑a "bo ‑wi" nʋa dɛsaʋn ɛ, 'ka ‑amɔ ‑a nʋ ‑ke,
‑a nʋɛ dɩ ‑nynia "jrii ɛ, 'pee kpʋn ‑a ‑ʋn ‑ɛ.
7 'De Esipʋ ɛ, ‑a "bo ‑wi" se jrii' ɛ nʋa mii' 'wɔn,
'saa 'ʋn ‑tuu" ‑tuu‑ ɛ nʋa, ɩ se ʋʋ ‑kwlɩ" sie‑,
ʋʋ nynaa "jrui de 'tɔniɛ ‑saan ‑kwlɩ".
8 'Kea 'pʋʋ‑ ʋʋpʋ‑ 'mɛ, 'de ɛɛ' 'nynɩ 'a dɛwɔn nɩ ‑tɩ' 'ʋn,
‑wɛe ɛ 'je ɛɛ' "ikmaa' to‑.
9 Ɛ "wɔɔ ''tɔniɛ ‑saan "jrui, 'sʋ ɛ ma';
‑wɛe ɛ kɔn ʋʋpʋ‑ "juɛi ʋʋ cɛɛn 'blʋɔ‑,
ka nyɔ 'ɔ jiia 'de ‑pɩɩɔn" "kpei ɛ.
10 Ɛ ‑sa ʋʋpʋ‑ 'de ʋʋa' 'ʋnyɛ nyʋ 'kwa,
‑wɛe ɛ 'pʋʋ ʋʋpʋ‑, 'de ʋʋa tʋnyʋ 'a "ikmaa' "wɛin.
11 "Ni "muua ʋʋa' tʋnyʋ "jrui:
ʋʋa' due' koun ‑gbai' ka se ɛ "wɛin 'pʋ.
12 'Sʋ ɛɛ' 'cɛ 'jeɛ ɛɛ' wlu tɔ' 'ʋn,
‑wɛe ʋʋa ble ʋʋa 'bɛɛ‑ ɛɛ' 'nynɩ "i.
13 'Kaa ʋʋ ‑too" ɛ ɛɛ' nʋʋdɩ o "maea',
ʋʋ se dɩ ɛ ‑tea' 'de nya tɔi" tba.
14 Dɛ pɛɛ 'ɛ "i poa' mɛ ‑ji" 'de ʋʋpʋ‑ 'ʋn,
'de ‑pɩɩɔn" 'blʋa "kpei. Ʋʋ ‑teɛn' Kea i.
15 Dɛ ʋʋ ‑teeɛ' i ɛ, ɛ "nyɩɛ ʋʋpʋ‑ 'mɛ,
mamaʋ 'sʋ ɛ je ʋʋpʋ‑ wɔn i nyaa,
ɛ nʋɛ 'sʋ dɛdi tʋn 'a nʋ ʋʋpʋ‑ ʋʋa jea sɔɔ.
16 ‑Ta ʋʋa fɔn a ʋʋ nʋɛ Moisɩ ke Arɔn,
Tʋ "bo ‑tea' kpɔ "i ‑kwlɛn o.
17 'blʋa kanyɛ wɔn ‑wɛe ɛ mla Datan,
'de ɛ "mua‑ Abiramʋ 'a 'cɛ "jrui ‑ke.
18 Nɛ di ʋʋpʋ‑ 'a ‑gboo 'mɛ,
nɛ ‑gbɔa di 'diwɔnyniʋn ‑wee'‑ 'mɛ.
19 'De Orɛbʋ ɛ, ʋʋ ma bli' ju
‑wɛe ʋʋa ‑gbɛɛ'‑ "nma ʋʋ bla "juɛi.
20 Kea ‑nɩa dɛwɔn mɛ ʋʋ ‑saa ‑jei",
‑wɛe ʋʋ poo bli' ‑ɛɛ dia sii" "jrui 'de ɛ ‑kɔi".
21 Ʋʋ "maeɛ ʋʋa' Kea ‑ɛ ‑pʋʋa' ʋʋpʋ‑,
‑wɛe ɛ nʋa dɩ klae" 'de Esipʋ o.
22 Jrii' ‑nʋa 'de Kamʋ 'a 'blʋa 'di,
'jrii klae" ‑nʋʋa 'de 'tɔniɛ ‑saan wɔn.
23 'De ɛ wlu ɛ 'na ɛ 'je ʋʋpʋ‑ i ‑sa
'kaa Moisɩ Kea ‑sa 'o mɔ ‑nynai 'de ɛ "juɛi,
‑ɔɔ baeɛ ‑wɛe ɔ 'je ɛɛ' 'cɛn klaa" ‑ɛɛ dooa dɩ ja jaa‑.
24 Ʋʋ ‑saa crɔn' dɩ "jru ‑sɔn,
dɛ ‑nʋɛ ʋʋ se Tʋ "bo 'a wlu tɔ' 'ʋn 'je.
25 Ʋʋ wluuɛ 'mii 'de ʋʋa' poe" ‑sɔn i,
ʋʋ se Tʋ "bo wlu wɔn 'je.
26 ‑Wɛe ɛ kpa sʋn 'jɛi" ɛ ‑srɛɛn,
ɛ 'je ʋʋpʋ‑ 'a "ku 'blʋɔ i po, 'de ‑pɩɩɔn" 'blʋa "kpei.
27 'De ɛ 'je ʋʋa' "ji i ‑sa 'de nyiɔpʋ‑ "klu, ‑wɛe ɛ 'je ʋʋpʋ‑ ja ‑gba' 'de 'blʋa 'di.
28 Ʋʋ ke Baalɩ Peɔɔ' "siiɛ "i,
‑wɛe ʋʋ di 'sraadɩ‑ ‑ɩ ‑saa 'de 'mɛnyʋ 'a 'nynɩ 'ʋn.
29 Ʋʋa' nʋʋdɩ ‑sa Tʋ "bo 'a 'cɛn "blo,
'sʋ nʋa' ‑ka' ʋʋpʋ‑ "kpei.
30 Finea 'wlʋʋa de ɔ poa 'e sʋn 'sʋ 'kle nynai.
31 Dɩ ɔ nʋa ɛ ‑srooɛ' 'bo ɔ "jru,
de ɔɔ' "ji 'a "ji "jru mamaʋ 'sʋ ɛ se "ti ‑ta 'ble.
32 Ʋʋ kpa Kea 'a 'cɛn "jɛi 'de Meriba',
'de ɛɛ' ‑tɩ' 'ʋn ɛ ja Moisɩ 'kle "kpei.
33 Ʋʋ "kaeɛ ɔɔ' ‑suu "jrii,
'sʋ wlu ‑ke ɔ sea "i ‑koɔɔ' ɔ jeɛ po.
34 'Blʋɩ Tʋ "bo 'na ʋʋ ‑sai ɛ ʋʋ sɩ i ‑sa.
35 Ʋʋ 'kpa 'e 'blʋɩ 'srʋ "klu, ‑wɛe ʋʋa nʋ ʋʋpʋ‑ 'a kplɩn.
36 Ʋʋa ‑gbɛɛ'‑ ɩa' kɔin "juɛi,
‑wɛe ʋʋ 'kpa 'e ɩa' ‑sepɩɛ 'di.
37 Ʋʋ ‑saa ʋʋa "nynuu‑ nmaɩ nynuu ke,
'nynʋkpae' nynuu ‑mʋ 'a ‑cɛ" sraa‑ 'ʋn 'de kɔin ‑pee.
38 Ʋʋ 'wla ʋʋa' "nynuu‑ nmaɩ nynuu ke,
'nynʋkpae' nynuu‑ ‑sea' dɛ jrɛ' nʋ 'a nmɔ i,
ʋʋ ‑saa ʋʋpʋ‑ 'sraa 'ʋn,
ʋʋ jɩ kɔin ‑nɩa 'e Kanaa 'blʋa "kpei "nyɩ,
‑wɛe ʋʋa' "ku 'dbaa kpʋʋn 'blʋa ‑wee'‑ ‑flɛn".
39 Ʋʋa' nʋʋdɩ ‑sraan"‑ ʋʋpʋ‑ 'mɛ,
ʋʋa' nʋʋ kplɩn nʋɛ' ʋʋpʋ‑ ‑kɔ' "jɛi 'je nyʋ.
40 Tʋ "bo 'a 'cɛn ɛ nɛ 'wlʋɛ "blo 'de ɛɛ' 'cɛ "kpei,
‑wɛenyʋ ‑nɩa ɛɛ' 'cɛ 'de ɛ, ʋʋa' ‑tɩ' nyaa ɛ wɛin.
41 Ɛ ‑sa ʋʋpʋ‑ sʋn "kpei 'de 'blʋa 'srʋ ‑pee,
‑wɛe nyʋ ‑nyɩa ʋʋpʋ‑ 'ʋn a cri ʋʋpʋ‑.
42 Ʋʋa' tʋnyʋ na ʋʋpʋ‑ "kpei,
‑wɛe ʋʋ nɩ 'de ʋʋa' kɛ' ‑sɔn.
43 'Kaa ʋʋa "jru kua' 'a muɛ nya,
‑wɛe ʋʋ "ti 'e ʋʋa' dɛsaʋn 'di.
44 'Kamɔ ‑bo ɛ 'wɔn ʋʋa' 'dawlu 'sʋ ɛɛ gbʋɛn ʋʋa' 'kle ja.
45 'De ʋʋa' 'dɔe 'a ‑tɩ' 'ʋn,
ɛ poɛ ɛɛ' dbɛɛdɛ ‑nɩa 'de ɛ ke ʋʋpʋ‑ 'nynɩ 'a ‑tɩ' ‑kwlʋ o,
'de ʋʋa' ‑tɩ' kmaa' klaa" ‑nɩa 'de ɛ 'ʋn,
ɛ se ɛ "i nɩ ʋʋ 'je "jrii "kae‑.
46 Ɛ bla nyʋ ‑blea ʋʋpʋ‑ kʋʋɔn 'ʋn 'a pɛe "i,
‑wɛe ʋʋ 'je ʋʋ wɛe 'ʋn 'je.
47 ‑Ɩn ‑seie ‑aʋn Tʋ "bo ‑aa Kea,
‑ɩn ‑sa ‑ʋn 'blʋɩ 'dii, ‑ɩn je ‑a ‑ʋn "jrui ‑gboo'‑,
‑wɛe ‑a ‑je ‑ma 'nynɩ ‑kwɛa i o blee‑,
'de ‑ma 'nynɩ "i 'bɛɛa' 'je ‑aa ciaan"‑ nɩ‑.
48 "Diwan kpʋn Tʋ "bo, Israɛ 'a Kea,
'de nɔ" 'oo nɔ" ‑wee'‑ 'di,
wɛe 'cɛ ‑wee'‑ "klein 'je wlu ka: 'Kɩ 'je nɩ‑.
Ao 'bɛɛ‑ Tʋ "bo 'a 'nynɩ "i.